Վերջին շրջանում ստանում ենք բազմաթիվ բողոքներ՝ Ասոցիացիայի անդամ չհանդիսացող առանձին կառուցապատողների վարքագծի և դրա անբարենպաստ սոցիալական հետևանքների վերաբերյալ, որը մտահոգիչ է թե՛ ներդրումային գրավչության, թե՛ գնորդների իրավունքների պաշտպանության տեսանկյունից։
Դրանով պայմանավորված՝ անհրաժեշտ ենք համարում բարձրաձայնել.
✅ Առանձին կառուցապատողների ստանձնած պարտավորությունների ոչ պատշաճ կատարման, թույլ տված էական խախտումների հետևանքով տուժում են գնորդները և նրանց ներդրած միջոցները, իսկ կառուցվող անշարժ գույքը վերջիններիս փոխանցման հնարավորությունը դառնում է անորոշ,
✅ Առանձին կառուցապատողների վարքագծով և թույլ տված խախտումներով պայմանավորված՝ վտանգվում է կառուցապատողների ողջ համայնքի գործարար համբավը, որի արդյունքում տուժում է ոլորտի հետագա ներդրումային գրավչությունը, ձևավորվում է ընդհանուր անվստահության մթնոլորտ,
✅ Ներկայումս առավելապես անհրաժեշտ է, որ բլոր կառուցապատողները գործեն բարեխղճորեն, և ժամկետներում կատարեն ստանձնած պարտավորությունները,
✅ Գնորդներին խնդրում ենք ցուցաբերել կառուցողական վարքագիծ և առանձին կառուցապատողների վարքագծով պայմանավորված՝ պատկերացում չձևավորել ընդհանուր կառուցապատողների համայնքի վերաբերյալ,
✅ Կարևորելով երկրի տնտեսական կյանքում կառուցապատման ոլորտի դերն ու նշանակությունը, ոլորտի մասնակիցների իրավունքների և օրինական շահերի պաշտպանության, գնորդների և պետության հնարավոր ռիսկերի կառավարման և կանխարգելման անհրաժեշտությունը՝ Ասոցիացիան շահագրգիռ մարմինների հետ նախաձեռնել է աշխատանքներ՝ կառուցապատման ոլորտի կանոնակարգմանն ուղղված հատուկ օրենսդրական կարգավորումների և շուկայական գործիքների մշակման ուղղությամբ, ինչը որոշակիորեն կկանոնակարգի առկախված խնդիրները և կօգնի հետագա խնդիրների արդյունավետ հաղթահարմանը: