Հայաստանի կառուցապատումների ռեյտինգավորում

Յուրաքանչյուր րոպե Երևանի ընդերքը փոփոխությունների է ենթարկվում, մինչդեռ մայրաքաղաքի ընդերքի ուսումնասիրության անչափ կարևոր հարցը բարձիթողի վիճակում է, ինչը հղի է  վտանգավոր հետևանքներով, նման կարծիք հայտնեց երկրաբանական գիտությունների թեկնածու Ռուբեն Յադոյանը:

Նրա խոսքով` մայրաքաղաքի կենտրոնում իրականացվող շինարարական աշխատանքները որպես կանոն իրականացվում են առանց երկրաբանական-ինժեներական  պատշաճ հաշվարկների: Նախկինում՝ խորհրդային տարիներին, նախքան այս կամ այն շենքի կառուցումը, ըստ Յադոյանի,  համապատասխան մասնագետները տեղանքի մանրազնին ուսումնասիրություններ էին կատարում,   մինչդեռ  այսօր ով փող ու թույլտվություն ունի՝ խելքին փչած ժամանակ և տեղում շենք ու շինություն է կառուցում,  առանց մտածելու, որ այդ շինությունների կառուցման ժամանակ թույլ տրված ցանկացած բացթողում կարող է մարդկային կյանքեր արժանանալ:

"Շենքը կառուցելիս կարևոր է հաշվի առնել  դրա հիմքի կրողունակությունը՝ գրունտների, ապարների ֆիզիկա-մեխանիկական հատկությունները: Մինչդեռ այդ անչափ կարևոր հանգամանքն այսօր մեծամասամբ ուշադրության չի արժանանում: Կառուցվող շենքերը շատ գեղեցիկ են,  բայց քանի՞ կոպեկ արժե այդ գեղեցկությունը, եթե դրանք հիմքը խարխուլ է",-նկատեց  Յադոյանը:

Նրա խոսքով՝  վերջին 20 տարվա ընթացքում մայրաքաղաքում  կառուցվում են հիմնականում բազմահարկ, խոշոր շենքեր, ինչը հիմավորված չէ: "Բարձրահարկ շենքեր կարելի է կառուցել բազալտային հիմք ունեցող տարածքներում՝ Արաբկիր վարչական շրջանից դեպի հյուսիս: Իսկ դեպի հարավ ընկած տարածքում խորքային ապարների կտրվածքն այնպիսին է, որը թույլ չի տալիս կառուցել բարձրահարկ շենքեր",-նկատեց երկրաբանը:

Անդրադառնալով  այսպես կոչված "էլիտար" շենքերին, որոնք հիմանկանում կառուցվում են մայրաքաղաքի կենտրոնում, նա նշեց. "Հատկապես Հյուսիսային պողոտայի և ընդհանրապես քաղաքի կենտրոնի տակ՝ Գետառից  աջ՝  Ղազար Փարպեցի փողոցից մինչև  "Դինամո" մարզադաշտն ընդգրկող տարածքի տակը դատարկ է:  Ես այս մասին ահազանգել եմ բազմիցս: Պետք  է շտապ կերպով ուսումնասիրվի կենտրոնի հատակը, որոշվեն դատարկությունների ճիշտ տեղերը, միջոցառումներ իրականացվեն այդ դատարկ տեղերը լցնելու ուղղությամբ, այլապես մի օր կենտրոնը կփլուզվի՝ հանգեցնելով անդառնալի և ողբերգական հետևանքների":

Եթե մայրաքաղաքի կենտրոնի դատարկությունը չլցվի, ըստ մասնագետի, հետագայում այդտեղ կառուցված շենքերը կենթարկվեն իջեցման, ճաքման, ընդհուպ՝ փլուզման:  "Եթե ընդերքի խոռոչը, որի վրա կառուցված է տվյալ շինությունը, լինի ասենք 20 մետր, ապա, այսպես կոչված, "էլիտար" շենքի ուղիղ կեսը կհայտնվի գետնի տակ",-հայտարարեց Յադոյանը՝ հավելելով, թե գործող քաղաքապետը խոսում է քաղաքի ճարտարապետական տեսքի մասին՝ պատշաճ ուշադրության չարժանացնելով  քաղաքի շենքերի ամրության հարցին:

Ռ. Յադոյանն անդրադարձավ նաև Կառավարության  շենքի վրա կառուցվելիք թմբուկին՝ նշելով, որ այդ շենքը կառուցված է ճիշտ նախագծով՝ հաշվի առնելով  ընդերքի կրողունակությունը: "Սակայն այսօր, քանի որ յուրաքանչյուր վայրկյան մայրաքաղաքի  ընդերքը փոփոխությունների է ենթարկվում, շենքի վրա ավելացվող ամեն մի քար կարող է ազդել  շենքի ամրության վրա",-նկատեց Յադոյանը: 

Աղբյուրը` news.am